تسجيلات صوتية للمتظاهرين في مسيرة و في التحرير اليوم.

ساعتها كنت بقيت عند هيلتون رمسيس على النيل، و أغلب الناس ال فضلت كانت معي، كنت واقفة في وسط الطريقة باحاول أفهم ال بيحصل، فجأة لقينا ناس بتزعق فينا علشان نطلع على الرصيف، جرينا، لقينا مدرعتين جيش بيرجوا بسرعة جنونية في وسط الشارع ال مليان ناس. الأول افتكرتهم جنود أغبياء و هيموتونا بغباءهم. و بعدين المدرعات ابتدت تجري بسرعة مجنونة رايح جاي في الشارع، تجري في زيج زاج، تشوف مجموعة بتحاول تهرب فتجري وراهم، تطلع فوي الرصيف و تدهس ناس، تشوف ناس الناحية التانية فتحود تدوس عليهم. ماكنتش مصدقة نفسي، كنت مرعوبة. و بعدين المدرعتين بدلوا مع مدرعتين تانيين، عملوا نفس الحاجة ، جري جنوني، دهس للناس، الناس بتجري في كل اتجاه علشان تفادي محاولات الدهس. مجموعة من الناس ، فيهم على الأقل شابين صغيرين خالص، 14/ 15 سنة، كانوا مستخبيين ورا عربية خاصة راكنة في المكان، شفت المدرعة بتجري نحيتهم، بتطلع فوق العربية و تحطمها، و تدوس واحد من المستخبيين، الباقيين جربوا ناحية الأمن المركزي علشان ينجوا بنفسهم.

شهادة لبنى كاملة

ما فيش حاجة تتقال

بعد أن شهد طنطاوي لصالح مبارك في المحكمة، وشهادتة كانت عكس أول حديث له للشعب من كلية الشرطة، أطلق جنوده بالمدرعات لسحق المتظاهرين السلميين أمام مبنى الأذاعة والتليفيزيون بماسبيرو. المظاهرة كانت مسيرة تندد بالهجوم اللي حدث لكنيسة في أسوان. كنسية أسوان كان سادس حادث أعتداء على الأقباط وكنائسهم من المسلمين.

في الأيام التاليه كان الأعلام الرسمي مليان ناس بتتكلم عن أن الهجوم على الكنيسة خطأ لأن الأقباط مكانش معاهم تصريح وناس تانية قالت أن قبة الكنيسة حسب القانون ممنوع أن ترتفع أكثر من 4 أمتار. المهم اللوم كان على من لم يهجم و يدمر. وخرج أحد المتهمين بكفالة 500 جنية.

أطلق اليوم طنطاوي وجنرالات المجلس العسكري المدرعات لسحق المتظاهرين السلميين و شارك اليوم الأعلام الرسمي بالجريمة بزعمه أن ناس أطلقوا النار على الجيش ولكن لأن في قنوات تانيه ذاعت الحقيقة بالفيديو وهي أن مدرعات الجيش سحقت المتظاهرين السلميين، فكرر الجيش بمداهمة قناة 25 لمنعها من أعادة البث. في محاولة بائسة لأحتواء المجزرة التي أرتكبها.

أطلق اليوم طنطاوي وجنرالات المجلس العسكري المدرعات لسحق المتظاهرين السلميين ولكن في ماسبيرو شفت على التليفيزيون شخص بيلقي باللوم على الأقباط لأنهم كانوا بيهتفوا "بالطول والعرض أحنا ولاد الأرض" ولم يتهم الجيش بالقتل العمد.

القتل العمد هو التوصيف الوحيد لجريمة اليوم.

مفطصى: أهلا
ريتا: أهلا يا مصطفى

مفطصى: أيه هو تعريفك للتحرش الجنسي؟ و أيه هي الأفعال اللي بتعتبريها تحرش وأية مش تحرش؟

ريتا: الشعور بأني متضايقة في الطريق
          أني لازم أحمي جسمي بأيدي وبشنطتي أستعدادا لأي هجوم
          مش مجرد أني أتلمس
          لكن الشعور بأني مش في آمان
          حتى لو غير حقيقي
          الناس بتقرب قوي مش واخدين بالهم من الحدود بين أجسامهم وأجسام الآخرين
          

مفطصى: هل الناس بتدخل المساحة الشخصية بتاعتك عن قصد أم مفهومهم عن المساحة الشخصية مختلف؟

ريتا: أعتقد مفهومي يختلف
     لأن الكلام ده ينطبق على الستات كمان

مفطصى: هل فاكرة أول مرة حد تحرش بيكي؟

ريتا: أولى ثانوي عيل (مراهق) مسك صدري
     بعدها فضلت وقت طويل أحضن الملزمة بتاعتي

مفطصى: هل كان من المدرسة أو من الأماكن اللي بتروحيها؟

ريتا: لأ عيل مجهول قريب من البيت.
     كنت صغيرة وقتها، صرخت "يا حيوان"
     ما حدش في الشارع عمل حاجة وقتها
     ففكرت أني لازم أحمي نفسي
     علشان كده بأستخدم الملزمة (كدرع)
     لسة بتجيلي فكرة أني أحمي نفسي

مفطصى: أنتي شايفة أن دي طريقة ناجحة؟

ريتا: أيوه، بس محتاجة أيادي أكثر.
     كمان لازم أزعق بعد ما يحصل التحرش
     لازم أفضحة
     لكن ده بيخلي شكلي مجنونة أو عصابية

مفطصى: طيب ما هو تعدى حدودة هنا، لما حد بيتسرق العادي أنه يصرخ، هل الناس بتفتكر أنه مجنون لأنه صرخ؟

ريتا: لسبب ما الشارع مش بيدين المتحرش

تصوير أحمد عبد الفتاح